සංශෝධනය කරනලද රථ වාහන දඩ මුදල් අය කිරීම එළඹෙන සතියේ සිට ක්‍රියාත්මක වන බව ප්‍රවාහන නියෝජ්‍ය අමාත්‍ය අශෝක් අබේසිංහ පවසයි.

2017 අයවැය තුළින් දඩ මුදල් ඉහළ දැමීම යෝජනා වී තිබු අතර ඒ සම්බනධව ඇති වූ ජනතා විරෝධය හමුවේ අදාළ තීරණය තාවකාලිකව හකුලා ගනිමින් ජනාධිපතිවරයා අදාළ සංශෝධන පිලිබඳ සොයා බැලීමට කමිටුවක් පත් කරන ලදි.

කෙසේ වෙතත් මෙම සංශෝධනයට විරෝධය දැක්වූ ප්‍රධාන සාධකය වූ මාර්ග අනතුරු අවම කිරීමක් හෝ මාර්ග නීති ආරක්ෂා කිරීමට ජනතාව උනන්දු කරවීමේ අරමුණක් මෙහි නොමැති වීම සහ ආණ්ඩුවේ මූල්‍ය අර්බුධය මෙවැනි ගාස්තු වැඩි කිරීම් හරහා වසා ගැනීමට තැත් කිරීම පිලිබඳව අදාළ කමිටුව මඟින් කිසිඳු අවධානයයට ලක් කර නොමැති බව නව දඩ මුදල් සංශෝධනයෙන් පැහැදිලි වේ.

අදාළ සංශෝධිත ගාස්තු වැඩි කිරීම්.

පහත සඳහන් රථ වාහන වැරදි සඳහා අය කරනු ලබන අවම දඩ මුදල රුපියල් 25,000/- ක් දක්වා වැඩි කිරීම:
– වලංගු රියදුරු බලපත්‍රයක් නොමැතිව රිය ධාවනය කිරීම.

– රියදුරු බලපත්‍රයක් නොමැති තැනැත්තන් සේවයේ නියුක්ත කිරීම.

– මත්පැන් හෝ මත්ද්‍රව්‍ය භාවිතයෙන් අනතුරුව රිය ධාවනය.

– දුම්රිය මාර්ගයක් තුළට අපරික්ෂාකාරීව මෝටර් වාහනයක් ඇතුළු කිරීම.

-වලංගු රක්ෂණාවරණයක් නොමැතිව රිය ධාවනය.

පහත සඳහන් රථ වාහන වැරදි සඳහා දැනට අය කරනු ලබන අවම දඩ මුදල් සංශෝධනය කිරීම:
– අධික වේගයෙන් රිය පැදවීම.
(නියමිත උපරිම වේගය ඉක්මවා 20% දක්වා අධික වේගයෙන් රිය පැදවීමට රුපියල් 3,000ක්ද; නියමිත උපරිම වේගය ඉක්මවා 20% ට වැඩි හා 30%ට අඩු අධික වේගයෙන් රිය පැදවීමට රුපියල් 5,000ක්ද; නියමිත උපරිම වේගය ඉක්මවා 30% ට වැඩි හා 50%ට අඩු අධික වේගයෙන් රිය පැදවීමට රුපියල් 10,000ක්ද; නියමිත උපරිම වේගය ඉක්මවා 50% ට වැඩි අධික වේගයෙන් රිය පැදවීමට රුපියල් 15,000ක්ද වශයෙන් ස්ථානීය දඩ නියම කිරීම)

– වමෙන් ඉස්සර කිරීම.

(මෙම වරද සඳහා වන අවම ස්ථානීය දඩය රුපියල් 2,000/- ක් දක්වා වැඩි කෙරේ)

– වෙනත් තැනැත්තන් කෙරෙහි නොසැලකිලිමත්ව හෝ යුක්ති සහගත සැලකිල්ලක් නොමැතිව රිය ධාවනය කිරීම.

(මෙම වරද සඳහා රුපියල් 10,000/- ක අවම දඩයක් නියම කෙරේ)

-අපරික්ෂාකාරීව හෝ අනතුරුදායක ආකාරයකින් හෝ අන්තරාදායක වේගයකින් මෝටර් වාහනයක් ධාවනය කිරීම

. (මෙම වරද සඳහා රුපියල් 10,000/- ක අවම දඩයක් නියම කෙරේ)

– නියමිත වයසට අඩු වයසේ තැනැත්තන් විසින් රිය පැදවීම.

(මෙම වරද සඳහා දැනට පවතින අවම දඩය රුපියල් 5,000/- ක සිට 30,000/- දක්වා වැඩි කෙරේ)

– මෝටර් වාහන පනතේ ප්‍රකාශිතව දඬුවම දක්වා නොමැති යම් වරදක් සඳහා අදාළ කර ගනු ලබන පොදු දණ්ඩනය යටතේ අය කෙරෙන අවම දඩ මුදල රුපියල් 2,500/- ක් දක්වා වැඩි කිරීම.

ජංගම දුරකථනය භාවිත කරමින් රිය පැදවීම සම්බන්ධයෙන් රුපියල් 2,000/- ක ස්ථානීය දඩයක් නියම කිරීම.