හම්බන්තොට, කටුවන ප්රදේශයේ සිදුවූ ඝාතනය සම්බන්ධ වගකිවයුත්තන් නීතිය ඉදිරියට ගෙනඒම වෙනුවට ආණ්ඩුව මැදිහත්ව මෙම ඝාතනය ජනතා විමුක්ති පෙරමුණේ අභ්යන්තර ප්රශ්නයකට ලඝු කර සත්ය ඝාතකයින් නිදහස් කිරීමට උත්සාහ දැරීම බරපතළ තත්ත්වයක් බව ජනතා විමුක්ති පෙරමුණ පවසයි.
අද එම පක්ෂයේ ප්රධාන කාර්යාලයේ පැවැති මාධ්ය හමුවකදී අදහස් දැක්වූ එහි ප්රධාන ලේකම් ටිල්වින් සිල්වා මහතා ඝාතනයේ වගකීම ආණ්ඩුව භාරගත යුතු බවත්, වහාම මේ සම්බන්ධව චෝදනා එල්ලව ඇති පුද්ගලයින් අත්අඩංගුවට ගෙන ඔවුන් නීතිය හමුවට ගෙන ආ යුතු බවත් ප්රකාශ කළේය.
අදාළ වෙඩි තැබීම සඳහා පැමිණි පුද්ගලයින් කටුවන ප්රදේශයේම වෙසෙන අය බවත්, අදාළ රැස්වීමට පැමිණි කටුවන ප්රදේශයේ වැසියන් ඔවුන් හඳුනාගෙන ඇති බවත් ටිල්වින් සිල්වා මහතා මෙම මාධ්ය හමුවේ දී ප්රකාශ කළේය.
ඒ අනුව වෙඩි තැබූ පුද්ගලයින් පිළිබඳව ඔවුන්ගේ නම්, ගම් සහිතව පොලිසිය වෙත පැමිණිලි කර ඇති බවත් හෙතෙම සඳහන් කළේය.
මෙම සිදුවීම පෙරටුගාමී සමාජවාදී පක්ෂය මත පටවමින් ආණ්ඩුව ඇඟ බේරාගැනීමට උත්සාහ දැරීම විහිළුවක් පමණක් බවත්, ආණ්ඩුව විසින් දැන් සිදුකළ යුතුව ඇත්තේ ඉදිරිපත් වූ පැමිණිලි අනුව කටයුතු කිරීම බවත් මාධ්ය හමුවේ දී වැඩිදුරටත් අදහස් දැක්වූ ටිල්වින් සිල්වා මහතා සඳහන් කර සිටියේය.
Comments