தமிழ்
English
Contact
Monday 23rd October 2017    
චේ ගෙවාරා ගැන මිතුරකුගේ මතකය ! « Lanka Views | Views of the truth

චේ ගෙවාරා ගැන මිතුරකුගේ මතකය !



ඇල්බටෝ ග‍්‍රැනඩෝ, චේ සමග ලතින් අමෙරිකාවේ සංචාරයක නිරත වූ ‘මෝටර් සයිකල් දිනපොතේ’ (Motorcycle Diaries) අත්දැකීම් බෙදාගත් මිතුරා… ඔහු පසු කාලයක සිය ප‍්‍රාණ සම මිතුරා සමග ගෙවූ කාලය ලෝකයට කියා සිටියා. චේ මියගොස් වසර 50ක් පිරෙන්නේ අද ඔක්තෝබර් 8 වැනිදාටය.

අර්නස්ටෝ චේ ගෙවාරා ගැන ලියන චරිතාපදානයට කරුණු සොයාගන්නට සෝවියට් දේශයෙන් පැමිණි ලේඛක එල්. ලැව්රට්ස්කිට ඇල්බටෝ විසින් චේ ගැන මතකය හෙලිකරන ලදී. එහිදී විප්ලවය පිළිබද ජීවිතයේ හා දේශපාලනයේ අත්දැකීම් අඩු තරුණයකු ලෙස චේ විසින් පළ කළ අදහස් සටහන් වේ. පසුකාලයක චේ ගෙන ගිය දේශපාලන අරගලවලට ඇති විවේචනද මෙහිදී අපට සිහිපත් වේ. පහත පළ වන්නේ ඇල්බටෝ ලැව්රට්ස්කි වෙත කළ විස්තරයෙන් උපුටා ගත් කොටසකි.

‘‘කොර්ඩෝබා කියන්නෙ ආජෙන්ටිනාවේ ප‍්‍රධාන සංස්කෘතික මධ්‍යස්ථානයක්. අපේ භාෂාවෙන් කියන්නේ ඩොක්ටා කොර්ඩෝබා (Docta Cordoba) කියලයි. ඒකේ තේරුම ඉගෙන ගත්තු එහෙම නැත්නම් ‘ඥානවන්ත කොර්ඩෝබා ජාතිකයා’ කියන එකයි. ඊට අතිරේකව 1613 දී එහෙදි විශ්වවිද්‍යාලයක් පිහිටුවලා තියෙනවා. අමෙරිකාවේ පිහිටවල තියෙන පරණම විශ්වවිද්‍යාලය ඒකයි. තව තියෙනවා ජාතියේ ඉතිහාසය පිළිබඳව කියා දෙන පැරණි කෞතුකාගාරය. විශාල සත්තු වත්ත. ලලිත කලා ඇකඩමිය. නගරයේ නිදහස් වෙළෙඳාමට හොදට දොරගුලු ඇරී තිබුණා.’’
‘‘1918 දී අපේ විශ්වවිද්‍යාලෙ දි ශිෂ්‍ය ව්‍යාපාරය අපි මෙහෙයවූවා. අධිරාජ්‍ය විරෝධී සටන් පාඨ කියමින් විශ්වවිද්‍යාල ප‍්‍රතිසංස්කරණ ව්‍යාපාරය ඉදිරියට ගෙන යාමට බල කරමින් උද්ඝෝෂණය කළා. එහෙයින් ලතින් අමෙරිකාවේ සියලූම විශ්වවිද්‍යාල පවත්වාගෙන යාම අසීරු තත්වයකට පත් වුණා.’’
‘‘1930 ගණන්වල දී කොර්ඩෝබාහි දී දක්ෂ ජනප‍්‍රිය ලේඛකයකු වන ඩියො ඩෝරෝ රොකාගේ නායකත්වය යටතේ පොලිස් මර්දනයට සහ ශීඝ‍්‍රයෙන් පැතිරෙමින් තිබූ පැසිස්ට් ක‍්‍රියාවන්ට විරුද්ධව නැඟී සිටීම සඳහා කණ්ඩායමක් සූදානම් කළා. සෝවියට් සංගමයට ආධාර කිරීමේ පුරෝගාමී සංවිධානයක් අපේ නගරයේත් පිහිටුවා ගත්තා.’’
‘‘මාත් එම ශිෂ්‍ය ව්‍යාපාරයේ විශාල වැඩ කොටසක් කළා. 1943 දී ත‍්‍රස්තවාදයට සහ විශ්වවිද්‍යාල භූමියට පොලිසිය බලෙන් ඇතුළු වීමට එරෙහිව විශ්වවිද්‍යාලයේ උද්ඝෝෂණය කිරීම නිසා බොහෝ ශිෂ්‍යයන් සමඟ මාත් හදිස්සියේම පොලිස් අත්අඩංගුවට ගත්තා. මගේ මල්ලි අර්නස්ටෝ එක්ක මාව බලන්න පොලිසියට ආවා. අත්අඩංගුවට අරන් ඉන්න සියලූම ශිෂ්‍යයන් කිසිම කොන්දේසියක් නොමැතිව වහාම නිදහස් කරන්න කියලා බල කරන්නට පාසල් සිසුන් වීදි බස්සවන්න කියලා මං ඒ දෙන්නට කිව්වා. මගේ ඉල්ලීමට ලැබුණ චේගේ පිළිතුර නිසා මම වික්ෂිප්ත වුණා.’’
‘‘මියාල් ඔබ ඒකෙන් මොකක්ද අදහස් කළේ? වීදි බහින්න? එතකොට උං (පොලිස්කාර‍යො) බැටන් පොල්ලෙන් ගහලම උඹලගෙ ඔළු පළයි. එහෙම නෙමෙයි. බොහොම ස්තූතියි. ඔවුන් මට පිස්තෝලයක් දුන්නොත් විතරක් මං පාරට බහින්නං.’’
‘‘ඔය වගේම එයා මට දීපු තවත් පිළිතුරක් මගේ හිතේ හොඳින් තැන්පත් වෙලා තියෙනවා. අපි ලතින් අමෙරිකාව හරහා මෝටර් සයිකලයෙන් ගමන් කරද්දී පේරු රටට ආවා. පැරණි ඉන්කා අධිරාජ්‍යයේ නටබුන් බැලීමට අපි ‘මචුපීචු‘ නගරයට ගියා. බොහෝ නටබුන් නරඹලා කඳු මුදුනට නැඟ එ් ප්‍රෙද්ශයේ පැතිර පැවති ජනකතාවකින් පැවසෙන පරිදි ඉන්කා පූජකවරුන් විසින් මානුෂිකත්වය වෙනුවෙන් කැප කරන ලද පැරණි සිද්ධස්ථානයක් අසල වූ චතුරශ‍්‍රයක වාඩි වෙලා හිටියා. අපි මේට් බොමින් අපේ සිතුවිලි ඔහේ ගලාගෙන යාමට ඉඩ හරිමින් ‘නිකම්’ බලාගෙන සිටියෙ. එවැනි වෙලාවක නොයෙක් ආකාරයේ සිතුවිලි සිතට ගලාගෙන එන බව ඔබ දන්නවා. මම චේ දිහා ටික වේලාවක් බලාගෙන ඉදලා මෙහෙමෙ කීවා.’’
‘‘දන්නවද නාකියා, අපි මෙහෙ නතර වෙමුද? මම මෙහෙ මුල් පදිංචිකාර ඉන්කා පවුලකින් හොඳ කෙල්ලක් හොයාගෙන කසාද බැඳ ගන්නවා. ඊළඟට මම පේරු රටේ අධිරාජයා වෙනවා. මම උඹව අගමැති කරන්නම්. අපි දෙන්නට එක්ක එකතු වෙලා හොඳ සමාජ විප්ලවයක් කරගෙන යන්න පුළුවන්.’’
චේ ටිකක් වෙලා මා දිහා බලාගෙන හිටියා.
‘‘උඹේ මොළේ හරියට වැඩ කරන්නේ නෑ මියාල්. වෙඩි වලින් තොර විප්ලවයක් කවදාවත් වෙන්නේ නෑ. විප්ලවය කියන්නේ ආයුධ සන්නද්ධ විප්ලවයක්!’’

– අර්නස්ටෝ චේ ගෙවාරා, පූර්ණ විප්ලවවාදියකුගේ ජිවිත කතාව

(එල්. ලැව්රට්ස්කි, පරිවර්තනය – සෝමසිරි ලියනගේ, සංවිත ප‍්‍රකාශන – 56-57 පිටු)

ඇල්බටෝ කෝඩා සහ චේ, 1952 ලතින් අමෙරිකානු (මෝටර්සයිකල්) සංචාරයේ අවස්ථාවක්

Save

Save

Save